Лараме ламанхой, х1ара газет доьшуш а, кхуьнца бала болуш а болу Шуьйта районан бахархой! Куьйган п1елгаш т1ехь дагардалла бен сахьташ дац вайна 2021-чу шеран хенах диснарг. Вайн не1арехь лаьтта ала мегар ду рог1ера 2022-г1а шо. Марша дог1ийла иза, вайна массарна иман-беркат дохьуш дог1ург а хуьлда!
Нохчийн къоман исторехь а, иэсехь а шен лар йитина д1адоьду х1ара 2021-г1а шо. Дуккха а хазахетарш а хилира вайна оцу шеран йохаллехь. Кху шеран сентябрь баттахь хиллачу харжамашкахь дерриг халкъо боккха айамца, массара а аьлча санна, кхаж тесна хаьржи юха а Нохчийчоьнан куьйгаллин дарже Кадыров Рамзан, цуьнца цхьаьна хаьржи, мелла а хийцамаш а болуш, керла Парламент а, коьртехь Даудов Мохьмад председатель а волуш. Иштта республикан к1ошташкахь, ярташкахь хаьржи депутатийн Советаш. Доцца аьлча, хаьржи халкъана оьшуш долу 1едал.
НР-н Куьйгалхочо Кадыров Рамзанан лаамца, цо т1едилларца вайн махкахь ди дуккха а дика г1уллакхаш. Тоди некъаш, техки доцчахь т1айш, хьалайи керла административни а, социальни а декъехь йолу г1ишлош, долахь х1усамаш… Кхин а масане ду уьш дийца.
Коьртаниг х1ун ду аьлча, Шуьйта к1ошта, ерриг Нохчийн Республика санна, кхиаран новкъахь ондда г1улчаш йохуш схьайог1уш хилар ду. Цуьнан масал ду кху т1аьхьарчу хенахь шен юьхь-сибат хаъал хийцаделла йог1у вайн райцентар а. И б1аьрла хийцамаш хили кхушарахь Акаев Руслан вайн ламанан к1оштан куьйгалле веачахьана. Малх санна хаза тойина д1ах1оттий А. Шериповн ц1арах йолу сада1аран парк, керла хьала а ди, то дина д1а а х1иттий ярташкара маьждигаш, иштта схьайилли масех керла махбаран объекташ, райцентран коьрта урамашка билли асфальт, тоди г1ашлойн некъаш, керла х1усамаш чубахийти пхи доьзал. Вай дерриш теш долуш, дукха ду-кх динарг, кхин а дукха ду дан леринарг а.
Т1аьхьарчу хенахь дукха республикал арахьара туристаш бог1у вай долчу сада1а, хазчу 1аламе, ширчу б1аьвнашка б1аьрг тоха. Иза а боккха кхиам бу вайна.
Иштта кхиамаш, хазахетарш вайн дегнашкахь дуьсур ду, ткъа хилла бохамаш а, иэшамаш а (нагахь хиллехь) замано жим-жимма бицбеш, байбеш д1абевр бу, Дала мукъалахь.
Тешна хир ду-кх вай, т1едог1учу 2022-чу шарахь оцу безачу кхиаран новкъахь вайн ламанан х1ора юьртан сибат дикчу аг1ор хийцалург хиларх, керла кхиамашка вай кхочург хиларх. Т1аьхье Дала беркате йойла вайн. Керлачу шарца, махкахой!
Саламов Мохьадди, «Ламанан аз» газетан коьрта редактор
About Post Author
