Иорданерчу нохчашна кхаъ хилла Нохчийн меттан шо д1акхайкхорах

Иорданерчу нохчашна кхаъ хилла Нохчийн меттан шо д1акхайкхорах

Далла гергахь сийлахь ву бусалба уммат хаздеш вехарг, эхарт дуьненах ца хуьйцуш, ден-ненан сий лардеш, шен мохк а, халкъ а лоруш вехаш верг. Стеган вахар а, валар а Аллах1а рицкъ йаздинччохь бен хила йиш йац боху 1еламнаха. Вайн халкъана т1ех1иттинчу баланаша а, кхузахь хиллачу т1емаша а дуьне мадду д1асадаржийна вайн халкъ. Нохчийн мух1ажарийн ковранаш генарчу Хонкаран, Иордании, Шемин мехкашка д1айоьлхуш гина дуьне ду х1ара. Даймохк ца безаш а ца бахана уьш.
Вайн заманахь Европе хьов- ха, 120 шо сов хьалха Иордане д1абаханчу нохчашна йукъахь а хир вацара «Со гуттаренна а д1авоьду» аьлла, новкъаваьлла ваханарг! Даймохк — иза иштта атта биталуш бац нохчашка. Х1окху лаьттан к1оргенехь тасайелла, марзонан хутал хадо цатуьгург вайн ворх1е а ден синойн з1ийдиг йу. Хьалха заманахь говран ворданашкахь д1аихначу нехан т1аьхьенаша, Дала шайна ницкъ ма-баллара, нохчийн г1иллакх а, нохчийн мотт а ларбина. Ма-дарра аьлча, вайна, х1окху ц1ахь, Нохчийчохь болчу нохчашна эхь дара нохчийн мотт бицбича а, ца буьйцуш дехаш хилча а. Нохчийчохь а волуш нохчий хилла ваха хала дац. Ткъа геннахь, 1аьрбийн махкахь а волуш, нохчий хилар ду-кх доьналла а, хьуьнар а. Ирданерчу Заркъа г1ала а, Сухне, Сувайле, Аз-Заркъе йарташ а нохчаша йехкина йу, цигахь маьрша бехаш бу нохчий.
Нохчийн Республикин Мехкан-Дас, Кадыров Ахьмад-Хьаьжин Рамзана х1ара 2023-г1а шо Нохчийн меттан шо ду аьлла д1акхайкхорах боккха кхаъ хилла бу цигахь бехаш болу нохчий. Иштта, хьастаг1а, Заркъа г1алахь Иорданерчу нохчийн зударийн йукъараллин организации куьйгалло д1адаьхьира Нохчийн меттан шарна лерина цхьаьнакхетар. Оцу организации куьйгалхо йу вайна массарна дукхавезаш хиллалу (Дала декъалвойла иза), йеххачу хенахь Иордании паччахьан хьехамча а, Иордании Парламента депутат а лаьттина волчу шайх Джамо 1адбул-Бакъин йо1 Джамо 1абдул-Бакъин Х1ийама, цуьнан г1оьнча йу Хьаьжа-Асхьабан Нурин Марем. Цхьаьнакхетаре гулбеллачу зударшка маршаллин дош аьллачул т1аьхьа Х1ийамас а, Марема а кхин цкъаа билгалдаьккхира нохчийн мотт а, нохчийн г1иллакх а Дала деллачу ни1матех долу диканаш хилар. «Тахана вай гулдаларан бахьана ду вайн Дег1астанахь х1ара 2023-г1а шо Нохчийн меттан шо аьлла д1акхайкхийна хилар. Нохчийн мотт 1алашбайтарехь массаьрга а само йайтар йу оцу кхайкхаман коьрта 1алашо. Кху Урдунера нохчий
нохчийн мотт уггаре а ч1ог1а 1алашбинчарах лоруш бу.
Оцу т1ехь чекхдовлархьама, и мотт вай кегийчарна 1амош хила деза. Берана нохчийн мотт ца хаахь иза цуьнан ден а, ненан а бехк бу. Маттаца ду вайн къоман г1иллакх, оьздангалла, йахь. Х1окху вайн йукъараллин кхерчахь нохчийн меттан дарсаш луш дара х1ора шарахь. Дин 1алашдаре терра, 1алашбан безаш бу нохчийн мотт а. Нохчийн мотт 1алашбаре терра 1алашдан дезаш ду латта а. Ахь д1алуш долчул шозза сов беркат схьало лаьтто. Иштта ду, маттаца дерг а. Дала бусалба а долуш, нохчий а долуш, дахар а, далар а ийман чохь дойла вайн!», — элира, шен зударшлахь йоккхайолчу Хьаьжа-Асхьабан Марема. Цул т1аьхьа нохчийн меттан
хьехархо а, нохчийн къоман исбаьхьаллин литература дика йовзарца а нохчийн гуонашкахь йевзаш йолчу Султан Фаридан Жанарас шен дагах кхетта долу Нохчийн Республикин халкъан йаз- дархочун Бексултанов Мусан «Кху чуьра ик1ант» дийцаран кийсак йийшира. Оцу дийцарехь дуккха а ду ша а, шен къоман мотт а, мохк а бовза а, лара а лаам болчара дан дезаш. «Д1адаьлларг йухакаро хала ду. Вайн дай дин 1алашдархьама, х1ижрат дина, схьабаьхкинехь, вай а лардан деза дин, цара ларбина нохчийн мотт вай а бицбалийта ца беза. Шен къоман истори а, мотт а хьоме бу бохуш волчо, тахана ша волчохь, шена гуонаха дерг ц1ена латтаде. Д1адаьлларг — д1адахана.
Долчун пусар дан хьовса деза вай. Мотт 1алашбайтахь а, иза берашна марзбалийта х1ораммо ша волчохь къахьегахьа г1уллакхаш дика хир ду», — элира Жанарас.
Билгалдакха деза, Иорданехь бен бац 1аьрбийн моттий (Къуръанан мотт) а, нохчийн моттий а ший а цхьаьна ненан мотт санна дика хууш болу нохчий. Кхузарчу нохчийн башхалла йу иза. Дагадог1у, масех шо хьалха, Дала гечдойла цунна, Джамбеков Ша1ранис, ша Гуьржийн махкахь д1ахьош йолчу къаьмнийн меттанийн дуьненайукъарчу конференце вахана а волуш, цигахь Ингалсан махкара веанчу профессора аьллера бохуш далийна масал. «Кхечу пачхьалкхе д1акхелхинчу мух1ажарийн цигахь т1аьхье а кхиъна, амма шайн къоман мотт ларбинарш дуьнен чохь а цхьа нохчийн бен бац» аьллера цо.
Къоман мотт бераллехь дуьйна хезаш а, буьйцуш а хууш бацахь, иза 1емар бац, 1амахь а, оцу берана хийра мотт хилла буьсур а бу. Цундела, Заркъахь хиллачу гуламехь къоначу наношка кхайкхам бира шайн берашка нохчийн мотт бийцийта хила аьлла. Нохчийн меттан хьокъехь Заркъахь хилла долу цхьаьнакхетар, Дала мукъ лахь, т1аьххьара дац аьлла тешна ду вай.
ЭЛЬДЕРХАНОВА ЗАЙНАП

About Post Author

Общество